ਔਨਲਾਈਨ ਪੰਜਾਬੀ ਰਸਾਲੇ 'ਸਫ਼ਰਸਾਂਝ ' 'ਤੇ ਆਪ ਦਾ ਹਾਰਦਿਕ ਸੁਆਗਤ ਹੈ।ਇਸ ਸਾਈਟ ਦਾ ਮਕਸਦ ਪੰਜਾਬੀ ਸਾਹਿਤ ਦੀ ਝੋਲ਼ੀ ਮਿਆਰੀ ਲਿਖਤਾਂ ਪਾਉਣਾ ਹੈ। ਜੇਕਰ ਤੁਸੀਂ ਵੀ ਪੰਜਾਬੀ ਵਿੱਚ ਲਿਖਦੇ ਹੋ ਤੇ ਪੰਜਾਬੀ ਸਾਹਿਤ ਖ਼ਜ਼ਾਨੇ 'ਯੋਗਦਾਨ ਚਾਹੁੰਦੇ ਹੋ ਤਾਂ ਸਾਨੂੰ haikusyd@gmail .com 'ਤੇ ਈ -ਮੇਲ ਕਰ ਸਕਦੇ ਹੋ। ਸਾਹਿਤ ਦੀ ਕਿਸੇ ਵੀ ਵਿਧਾ (ਹਾਇਕੁ,ਤਾਂਕਾ, ਸੇਦੋਕਾ, ਹਾਇਬਨ ਜਾਂ ਚੌਵਰਗਾ) ਦਾ ਹਰ ਸਮੇਂ ਸਵਾਗਤ ਹੋਵੇਗਾ।ਤੁਹਾਡੀਆਂ ਲਿਖਤੀ ਪੈੜਾਂ ਨੂੰ ਸ਼ਾਮਿਲ ਕਰਕੇ ਸਾਨੂੰ ਖੁਸ਼ੀ ਹੋਵੇਗੀ।

'ਸਫ਼ਰਸਾਂਝ' ਪੰਜਾਬੀ ਸਾਹਿਤ ਦੇ ਵਿਕਾਸ ਤੇ ਪ੍ਰਸਾਰ ਲਈ ਇੱਕ ਨਿਮਾਣਾ ਜਿਹਾ ਉਪਰਾਲਾ ਹੈ। ਅੱਜ ਦੀ ਘੜੀ ਇਹ 51 ਦੇਸ਼ਾਂ ਤੱਕ ਅੱਪੜ ਚੁੱਕਾ ਹੈ ਤੇ ਰੋਜ਼ਾਨਾ ਤਕਰੀਬਨ 50 ਤੋਂ ਵੱਧ ਵਾਰ ਖੋਲ੍ਹ ਕੇ ਪੜ੍ਹਿਆ ਜਾਂਦਾ ਹੈ। ਕਦੇ-ਕਦੇ ਇਹ ਅੰਕੜਾ 200 ਨੂੰ ਵੀ ਟੱਪ ਚੁੱਕਿਆ ਹੈ। ਆਪ ਜੀ ਦੇ ਨਿੱਘੇ ਹੁੰਗਾਰੇ ਦੀ ਆਸ ਰਹੇਗੀ।

ਹੁੰਗਾਰਾ ਭਰਨ ਵਾਲ਼ੇ

1 Jan 2016

ਸੂਹੀ ਸਵੇਰ ਦੀ ਜ਼ੀਨਤ -2016

             ਚੱਪਾ ਕੁ ਚੰਦ ਤੇ ਤਾਰਿਆਂ ਵਾਲੀ ਚੁੰਨੀ ਪਾਈ ਸ਼ਾਹ ਕਾਲੀ ਰਾਤ ਕਦੋਂ ਦੀ ਮੁੱਕ ਗਈ ਸੀ। ਸੂਹੀ ਸਵੇਰ ਦੀ ਅਨੰਦਮਈ ਮਹਿਕ ਵਿਹੜੇ ਨੂੰ ਮਹਿਕਾ ਰਹੀ ਸੀ। ਸੰਧੂਰੀ ਸਵੇਰ ਦੀ ਗੁਲਾਬੀ ਪੌਣ 'ਚ ਹੌਲੇ -ਹੌਲੇ ਜਿਹੇ ਰੁੱਖਾਂ ਦੇ ਪੱਤ ਹਿੱਲ ਰਹੇ ਸਨ। ਮੈ ਦੋ ਚਾਰ ਖੁੱਲ੍ਹੇ ਲੰਬੇ ਸਾਹ ਖਿੱਚੇ ਤੇ ਤਾਜ਼ੀ ਹਵਾ ਦੇ ਬੁੱਲੇ ਸੰਗ ਰੰਗੀਨ ਕੁਦਰਤ ਨੂੰ ਵੀ ਆਪਣੇ ਸਾਹਾਂ ਰਾਹੀਂ ਆਪਣੀ ਰੂਹ ਨਾਲ ਮਿਲਾਉਣ ਦੀ ਕੋਸ਼ਿਸ਼ ਕੀਤੀ ਤੇ ਸ਼ਾਇਦ ਮੈਨੂੰ ਥੋੜੀ ਕਾਮਯਾਬੀ ਵੀ ਮਿਲੀ। 
      ਹੁਣ ਮੇਰੀ ਰੂਹ ਖਿੜ ਗਈ ਸੀ। ਮੈਨੂੰ ਇਓਂ ਲੱਗਾ ਜਿਵੇਂ ਪੂਰਾ ਆਲਮ ਹੀ ਖੁਸ਼ੀਆਂ- ਖੇੜੇ ਤੇ ਨਵੀਆਂ ਤਰੰਗਾਂ ਨਾਲ ਨਸ਼ਿਆਇਆ ਹੋਇਆ ਹੋਵੇ । ਅੱਜ ਨਵੇਂ ਸਾਲ ਵਾਲੇ ਦਿਨ ਰੁੱਖਾਂ ਦੀਆਂ ਟਹਿਣੀਆਂ ਵਿੱਚੋਂ ਪੱਤਿਆਂ ਨਾਲ ਖਹਿ-ਖਹਿ ਕੇ ਲੰਘਦੀ ਠੰਡੀ ਹਵਾ ਵੀ ਕੁਦਰਤ ਨੂੰ ਨਵੇਂ ਸਾਲ ਦੀਆਂ ਵਧਾਈਆਂ ਦਿੰਦੀ ਲੱਗੀ |  ਜ਼ਮੀਨ 'ਤੇ  ਅੱਧ ਲਿਟਿਆ ਘਾਹ ਧਰਤੀ ਨੂੰ ਪਿਆਰ ਤੇ ਮਮਤਾਮਈ ਚੁੰਬਣ ਦੇ ਕੇ 'ਨਵਾਂ ਸਾਲ ਮੁਬਾਰਕ' ਹੀ ਤਾਂ ਕਹਿ ਰਿਹਾ ਹੈ | ਬਗੀਚੀ ਦੀਆਂ ਕਿਆਰੀਆਂ ਵਿੱਚ ਖਿੜੀਆਂ ਫੁੱਲ -ਪੱਤੀਆਂ ਵੀ ਹਵਾ ਦੇ ਬੁੱਲੇ ਸੰਗ ਨੱਚਦੇ ਪ੍ਰਤੀਤ ਹੋ ਰਹੇ ਹਨ।
              ਮੈਨੂੰ ਪਤਾ ਹੀ ਨਾ ਲੱਗਾ ਕਦੋਂ ਮੇਰੇ ਕਦਮ ਧੂਹ ਕੇ ਮੈਨੂੰ ਨਦੀ ਕਿਨਾਰੇ ਲੈ ਆਏ। ਕੂਲੀ -ਕੂਲੀ ਤ੍ਰੇਲ ਭਿੱਜੀ ਘਾਹ 'ਤੇ ਪੋਲੇ ਪੱਬ ਧਰਦਿਆਂ ਇਓਂ ਲੱਗਾ ਜਿਵੇਂ ਇਹ ਤ੍ਰੇਲ ਬੂੰਦਾਂ ਵੀ ਚੜ੍ਹਦੇ ਸੁੂਰਜ ਦੀ ਲਾਲੀ ਵਾਲੀ ਧੁੱਪ ਨਾਲ ਹੀ ਲਿਸ਼ਕਾਂ ਮਾਰਦੀਆਂ ਨਵੇਂ ਸਾਲ ਨੂੰ ਜੀ ਆਇਆਂ ਕਹਿ ਰਹੀਆਂ ਹੋਣ। ਵਗਦੀ ਸਿਹਤ ਅਫਜ਼ਾ ਪੌਣ ਨੇ ਫੂਕ ਮਾਰ ਜ਼ਿੰਦ ਨੂੰ ਨਵੀਂ ਨਰੋਈ ਕਰ ਦਿੱਤਾ ਸੀ । ਭੌਰਿਆਂ ਦਾ ਮਸਤੀ ਭਰਿਆ ਸੰਗੀਤ ਹਵਾ ਦੀ ਸ਼ਾਂ -ਸ਼ਾਂ 'ਚ ਘੁਲ ਕੇ ਮੋਹ ਦਾ ਅਹਿਸਾਸ ਕਰਵਾ ਰਿਹਾ ਸੀ। ਕਹਿੰਦੇ ਨੇ ਕਿ ਮੋਹ ਉਹ ਦੌਲਤ ਹੈ ਜਿਸ ਨੂੰ ਜਿੰਨਾ ਖਰਚ ਕਰੋ ਓਨੀ ਵੱਧਦੀ ਹੈ। ਇਹ ਕੋਈ ਮਹਜ਼ਬ ਤਾਂ ਨਹੀਂ ਹੈ ਪਰ ਐਸੀ ਦਰਗਾਹ ਹੈ ਜਿੱਥੇ ਹਰ ਸਿਰ ਝੁੱਕਦਾ ਹੈ। 
           ਟਾਹਲੀ ਦੇ ਪੱਤਿਆਂ 'ਚੋਂ ਪੁਣ -ਪੁਣ ਲੰਘਦੀ ਸੂਰਜ ਦੀ ਲੋਅ ਮੈਨੂੰ ਜ਼ਿੰਦਗੀ 'ਚ ਤਰੱਕੀ ਦੀਆਂ ਬੁਲੰਦੀਆਂ ਛੂਹਣ ਲਈ ਸੰਘਰਸ਼ ਕਰਨ ਦਾ ਸੰਕਲਪ ਲੈਣ ਦਾ ਸੁਨੇਹਾ ਦਿੰਦੀ ਜਾਪਦੀ ਲੱਗੀ । 

ਰੰਗਲਾ ਪਾਣੀ -
ਪੱਤਿਆਂ 'ਚੋਂ ਛਣਦੀ  
ਸੂਰਜੀ ਲੋਅ। 
ਡਾ. ਹਰਦੀਪ ਕੌਰ ਸੰਧੂ 
ਨੋਟ: ਇਹ ਪੋਸਟ ਹੁਣ ਤੱਕ 34 ਵਾਰ ਪੜ੍ਹੀ ਗਈ

5 comments:

  1. ਨਮੇ ਸਾਲ ਦੀ ਨਮੀ ਸਵੇਰ ਨੂ ਕੁਦਰਤ ਦੇ ਸਤਰੰਗਾ ‘ਚ ਰੰਗ ਕੇ ਹਾਇਬਨ ਨੂ ਸੁੰਦਰ ਚਿਤ੍ਰ ਬਣਾ ਦਿੱਤਾ ਤੁਸਾਂ। ਬਹੁਤ ਸੁੰਦਰ ਹੈ। ਕੁਦਰਤ ਦੇ ਸੁਨੇਹੇ ਨੂ ਮਾਨ ਅਸਾਂ ਨੂ ਭੀ ਆਪਣੀ ਪ੍ਰਾਪਤੀ ਲੇਈ ਸੰਘਰਸ਼ ਕਰਨ ਦਾ ਸੰਕਲਪ ਲੇਣਾ ਚਾਈਦਾ ਹੈ ।
    ਇਹੀ ਕਾਮਨਾ ਹੈ ਇਸ ਸਨੇਹੇ ਤੇ ਅਸੀਂ ਅਮਲ ਕਰੀਏ।

    ReplyDelete
  2. ਕੁਦਰਤ ਵਿੱਚੋਂ ਨਵੇਂ ਵਰ੍ਹੇ ਦੀ ਖੁਸ਼ੀ ਲੱਭਣਾ ਕਿੰਨਾ ਸੁਖਦਾਈ ਅਨੁਭਵ ਹੈ। ਸੁੰਦਰ ਹਾਇਬਨ।
    ਦਵਿੰਦਰ

    ReplyDelete
  3. ਸੁੰਦਰ ਚਿੱਤਰਣ

    ReplyDelete
  4. Anonymous4.1.16

    ਨਵੇਂ ਸਾਲ ਦੀ ਨਵੀਂ ਤਾਜ਼ਗੀ , ਮੁਬਾਰਕ

    ReplyDelete

ਤੁਹਾਡੇ ਸਾਰਥਕ ਵਿਚਾਰਾਂ ਦੀ ਉਡੀਕ ਰਹੇਗੀ