ਲੋਕਤੰਤਰ (ਸੇਦੋਕਾ)

1. 

ਲੋਕਤੰਤਰ
ਵੋਟ ਦਾ ਅਧਿਕਾਰ 
ਬਣਦੀ ਸਰਕਾਰ
 ਭ੍ਰਿਸ਼ਟਾਚਾਰ 
ਰਗ ਰਗ ਰਚਿਆ
ਦੁੱਖੀ ਲੋਕ ਲਾਚਾਰ। 

2.
ਹੱਥ ਜੋੜਨ
ਕਰਦੇ ਨੇ ਵਾਅਦੇ 
ਕਦੀ ਨਾ ਹੁੰਦੇ ਪੂਰੇ
ਲੀਡਰ ਝੂਠੇ
ਚੜ੍ਹ ਬੈਠ ਕੁਰਸੀ
ਹੱਥ ਫੜਾਣ ਠੂਠੇ। 

  ਇੰਜ: ਜੋਗਿੰਦਰ ਸਿੰਘ"ਥਿੰਦ"
   ( ਅੰਮ੍ਰਿਤਸਰ--ਸਿਡਨੀ) 

ਨੋਟ : ਇਹ ਪੋਸਟ ਹੁਣ ਤੱਕ 25 ਵਾਰ ਪੜ੍ਹੀ ਗਈ। 

ਬੰਦ ਕਿਤਾਬ (ਤਾਂਕਾ)

1.

ਬੰਦ ਕਿਤਾਬ 
ਕਦੇ ਖੋਲ੍ਹ ਪਾਉਂਦੇ 
ਪਤਾ ਲੱਗਦਾ 
ਤੁਸੀਂ ਹੀ ਰਹੇ ਸਾਡੇ 
ਜੀਵਨ ਤੋਂ ਪਿਆਰੇ। 

2.
ਬੰਦ ਕਿਤਾਬ 
ਸਾਲਾਂ ਬਾਅਦ ਖੁੱਲ੍ਹੀ 
ਖੁਸ਼ਬੋ ਉੱਡੀ 
ਸ਼ਬਦ ਸ਼ਬਦ 'ਚੋਂ 
ਤੇਰੀ ਮਿੱਠੀ ਛੂਹ ਦੀ। 

ਰਾਮੇਸ਼ਵਰ ਕੰਬੋਜ ਹਿੰਮਾਂਸ਼ੂ 
ਨਵੀਂ ਦਿੱਲੀ 

ਨੋਟ : ਇਹ ਪੋਸਟ ਹੁਣ ਤੱਕ 16 ਵਾਰ ਪੜ੍ਹੀ ਗਈ। 

ਨਵੀਂ ਪੜ੍ਹਾਈ

1.
ਹੱਥ ਮੋਬੈਲ 
ਉਂਗਲਾਂ ਨੂੰ ਘੁਮਾਵੇ
ਕਰਦਾ ਚੈਟ।




2.
ਲੈ ਲੈਪਟਾਪ
ਚਲਾਵੇ ਫੇਸਬੁੱਕ
ਨਵੀਂ ਪੜ੍ਹਾਈ। 



ਜਗਦੀਸ਼ ਰਾਏ ਕੁਲਰੀਆਂ 
ਬਰੇਟਾ (ਮਾਨਸਾ)

ਨੋਟ : ਇਹ ਪੋਸਟ ਹੁਣ ਤੱਕ 30 ਵਾਰ ਪੜ੍ਹੀ ਗਈ। 

ਪੀਲੀ ਫ਼ਰਾਕ

ਵੱਡੇ ਦਿਨਾਂ ਦੀਆਂ ਛੁੱਟੀਆਂ ......ਨਾਨਕੇ ਜਾਣ ਦਾ ਛਣਕਦੇ ਘੁੰਗਰੂਆਂ ਵਰਗਾ ਚਾਅ। ਛੁੱਟੀਆਂ ਦਾ ਕੰਮ ਮੁੱਕਾ ਅਸੀਂ ਲੁੱਡੀਆਂ ਪਾਉਂਦੇ ਨਾਨਕੇ ਆ ਗਏ। ਚਿਹਰਿਆਂ 'ਤੇ ਰੱਜਵਾਂ ਖੇੜਾ ...... ਦਿਨ ਬਹਾਰਾਂ ਦੇ ਬੁੱਲਿਆਂ ਵਰਗੇ ਜਾਪਣ ਲੱਗੇ। ਖਾਣ ਨੂੰ ਨਿੱਤ ਨਵੇਂ ਪਕਵਾਨ  ......ਕਦੇ ਖੀਰ ਪੂੜੇ ਤੇ ਕਦੇ ਘਿਓ ਨੁੱਚੜਵੀਆਂ ਚੂਰੀਆਂ। ਦਿਨੇ ਅੰਦਰਲੇ ਘਰ ਤੇ ਕਦੇ ਬਾਹਰਲੇ ਘਰ ਅਸੀਂ ਨਿੱਕੇ -ਨਿੱਕੇ ਘੁੰਗਰੂਆਂ ਦਾ ਮੀਂਹ ਵਰ੍ਹਾਉਂਦੇ ਫਿਰਦੇ।  ਰਾਤ ਨੂੰ ਨਾਨੀ ਤੋਂ ਕਦੇ ਚੰਮ ਦਾ ਚਮੋਟਾ, ਰੂਪ -ਬਸੰਤ ਜਾਂ ਫਿਰ ਦਿਓ ਵਾਲੀਆਂ  ਬਾਤਾਂ ਸੁਣਦੇ। 
     ਇੱਕ ਦਿਨ ਮੈਨੂੰ ..........ਮਸਤ ਪੌਣ ਦੇ ਹੁਲਾਰੇ ਝੁਟਦੀ ਨੂੰ ....ਮੇਰੀ ਵੱਡੀ ਮਮੇਰੀ ਭੈਣ ਨੇ ਕੋਲ਼ ਬੁਲਾਉਂਦਿਆਂ ਕਿਹਾ, " ਐਧਰ ਆ .....ਤੇਰਾ ਮੇਚਾ ਲੈਣਾ ਹੈ।" ਭੈਣ ਦੀ ਸਿਲਾਈ ਮਸ਼ੀਨ ਕੋਲ਼ ਪੀਲੇ ਰੰਗ ਦਾ ਕੱਪੜਾ, ਰੰਗ ਤੇ ਬੁਰਸ਼ ਵੇਖ ਮੇਰੇ ਮਨ 'ਚ ਜਿਗਿਆਸਾ ਦੇ ਜੁਗਨੂੰ ਬਲ਼ ਉੱਠੇ। ਮੈਂ ਕੀ, ਕਿਓਂ, ਕਿਵੇਂ ਦੇ ਸਵਾਲਾਂ ਦਾ ਮੀਂਹ ਵਰ੍ਹਾ ਦਿੱਤਾ। ਹਾਣੀਆਂ ਨਾਲ ਖੇਡਦੀ......ਸੁਆਦਲੀਆਂ ਖੇਡਾਂ ਛੱਡ ਕੇ ਮੈਂ ਉਥੇ ਹੀ ਚੌਂਕੜੀ ਮਾਰ ਕੇ ਬੈਠ ਗਈ। ਦੋ ਖੜੀਆਂ ਇੱਟਾਂ 'ਤੇ ਸ਼ੀਸ਼ਾ ਧਰ ਕੇ ਭੈਣ ਨੇ ਛੋਟਾ ਜਿਹਾ ਇੱਕ ਮੇਜ਼ ਬਣਾਇਆ। ਮੇਜ਼ ਥੱਲੇ ਬਲਬ ਜਗਾ ਕੇ ......ਕਾਗਜ਼ 'ਤੇ ਵਾਹੀ ਫੁੱਲਾਂ ਵਾਲੀ ਬੱਤਖ ਨੂੰ ਪੀਲੇ ਕੱਪੜੇ 'ਤੇ ਉਕਰਿਆ। ਆਪਣੀਆਂ ਕਲਾਤਮਿਕ ਛੋਹਾਂ ਨਾਲ ਗੁਲਾਬੀ -ਹਰਾ ਰੰਗ ਭਰ ਕੇ ਬੱਤਖ ਨੂੰ ਸੱਚੀ ਹੀ ਜਿਉਂਦੀ ਕਰ ਦਿੱਤਾ ਸੀ। .......ਤੇ ਫੇਰ .......ਚੱਲਦੀ ਸਿਲਾਈ ਮਸ਼ੀਨ ਦਾ ਸੁਰ ਮੈਨੂੰ ਕਿਸੇ ਅਗੰਮੀ ਪ੍ਰਸੰਨਤਾ ਦੇ ਹੁਲਾਰੇ ਦੇਣ ਲੱਗਾ। ਸਰਕਦੇ ਦਿਨ ਦਾ ਮੈਨੂੰ ਪਤਾ ਹੀ ਨਾ ਲੱਗਾ। ਆਥਣ ਨੂੰ ਪੀਲੇ ਰੰਗ ਦੀ ਫ਼ਰਾਕ ਜਦੋਂ ਮੈਂ ਪਾਈ ਤਾਂ ਛਣ -ਛਣ ਕਰਦੇ ਮੇਰੇ ਹਾਸੇ ਨਾਲ ਵਿਹੜਾ ਭਰ ਗਿਆ। 
              ਸੰਦਲੀ ਯਾਦਾਂ ਦੀ ਗੱਠੜੀ ਖੋਲ੍ਹ ........ਅੱਜ ਵੀ ਜਦੋਂ ਕਦੇ ਮੈਂ ਉਹ ਪੀਲੀ ਫ਼ਰਾਕ ਪਾਉਂਦੀ ਹਾਂ ਤਾਂ ਵੱਡੀ ਭੈਣ ਦੇ ਦਿੱਤੇ ਨਿੱਘੇ ਮੋਹ ਤੇ ਅਪਣੱਤ ਦੀ ਮਹਿਕ ਨਾਲ ਮੇਰਾ ਆਪਾ ਭਰ ਜਾਂਦਾ ਹੈ। ਮੈਂ ਕਿਸੇ ਬਾਗ ਦੀ ਨੁੱਕਰੇ ਤਰਕਾਲਾਂ ਵੇਲੇ ਖਿੜੇ ਗੁਲਾਬ ਵਾਂਗ ਟਹਿਕਣ ਲੱਗ ਜਾਂਦੀ ਹਾਂ। 

ਪੀਲੀ ਫ਼ਰਾਕ -
ਮੋਹ ਧਾਗੇ ਸਿਉਂਤੀ 
ਨੱਚੀ ਨਿੱਕੜੀ। 

ਡਾ. ਹਰਦੀਪ ਕੌਰ ਸੰਧੂ
(ਅੱਜ ਵੱਡੀ ਭੈਣ ਦਵਿੰਦਰ ਦੇ ਜਨਮ ਦਿਨ 'ਤੇ ਇਹ ਹਾਇਬਨ ਤੋਹਫ਼ਾ)

ਨੋਟ : ਇਹ ਪੋਸਟ ਹੁਣ ਤੱਕ 40 ਵਾਰ ਪੜ੍ਹੀ ਗਈ। 

ਗੀਤ ਸੁਰੀਲੇ

ਇਹ ਵੀਡੀਓ ਸ਼ਾਇਦ ਤੁਹਾਨੂੰ ਵੀ ਪ੍ਰਭਾਵਿਤ ਕਰੇ। 

ਸਾਜ਼ ਪਤੀਲੇ 
ਗਾਉਣ ਮੰਗਤੀਆਂ 
ਗੀਤ ਸੁਰੀਲੇ। 

ਡਾ. ਹਰਦੀਪ ਕੌਰ ਸੰਧੂ 

ਨੋਟ : ਇਹ ਪੋਸਟ ਹੁਣ ਤੱਕ 38 ਵਾਰ ਪੜ੍ਹੀ ਗਈ। 

ਖਾਣ ਲਵੇਰੇ

1.
ਭੱਜਣ ਜੱਟ
ਕਹੀਆਂ ਮੋਢੇ ਰੱਖ 
ਪਾਣੀ ਬੰਨਦੇ। 

2.
ਫੁੱਟਦਾ ਘਾਹ 
ਹਰਾ -ਹਰਾ ਚੁਫੇਰੇ 
ਖਾਣ ਲਵੇਰੇ। 

ਪ੍ਰੋ. ਨਿਤਨੇਮ ਸਿੰਘ 
(ਮੁਕਤਸਰ )

ਨੋਟ : ਇਹ ਪੋਸਟ ਹੁਣ ਤੱਕ 30 ਵਾਰ ਪੜ੍ਹੀ ਗਈ। 

ਸਾਉਣ ਦੀ ਝੜੀ

ਸ਼ਾਮ ਦਾ ਵੇਲ਼ਾ ......ਅਤਿ ਦੀ ਗਰਮੀ........ਸਾਰਿਆਂ ਦੇ ਨਾਲ ਮੈਨੂੰ ਵੀ ਮੀਂਹ ਦੀ ਉਡੀਕ ਸੀ। ਦੇਖਦੇ ਹੀ ਦੇਖਦੇ ਬੱਦਲਾਂ ਦੀ ਇੱਕ ਟੁਕੜੀ ਪੁਰੇ ਵੱਲੋਂ ਆਈ  ਤੇ ਮੇਰੇ ਘਰ ਦੇ ਅਸਮਾਨ 'ਤੇ ਛੱਤਰੀ ਬਣ ਖਲੋਤੀ ........ਤੇ ਹੌਲੀ -ਹੌਲੀ ਅਸਮਾਨ ਬੱਦਲਾਂ ਨਾਲ ਭਰ ਗਿਆ। 
ਰੁੱਖਾਂ ਪੌਦਿਆਂ ਦੇ ਕੁਮਲਾਏ ਪੱਤਿਆਂ 'ਤੇ ਇੱਕ ਟਹਿਕ ਜਿਹੀ ਆ ਗਈ। ਕਲੀਆਂ ਦੀ ਮਹਿਕ ਦੂਣੀ ਹੋ ਗਈ ਸੀ। ਚੰਬੇਲੀ ਦੀ ਸੁਗੰਧੀ.......ਚਿੜੀਆਂ ਦੀ ਚਹਿਚਹਾਟ ........ਠੰਡੀ ਹਵਾ ਦੇ ਬੁੱਲੇ .........ਮਨ ਬਾਉਰਾ ਹੋ ਗਿਆ ਸੀ। ਦਿਲ ਕਰੇ ਦੌੜਦੀ ਫਿਰਾਂ........ ਪੇੜਾਂ ਵਿੱਚ ........ਫੁੱਲਾਂ ਵਿੱਚ।
.............ਪਰ ਕਿਤੇ ਇੱਕ ਇੱਕਲ ਸੀ ਜੋ ਉਦਾਸੀ ਲੈ ਆਈ ਸੀ। ਸਬੱਬੀਂ ਓਹਨਾਂ ਪਲਾਂ 'ਚ ਮੇਰੀ ਕਲਮ ਮੇਰੇ ਬਿਲਕੁਲ ਪਾਸ ਸੀ। ਮੈਂ ਡਾਇਰੀ ਕੱਢੀ ਤਾਂ ਕਵਿਤਾ ਮੇਰੇ ਸਾਹਮਣੇ ਆ ਖਲੋਤੀ.......ਤੇ ਮੇਰੀ ਇੱਕਲ ਟੁੱਟ ਗਈ। ਏਸ ਖੁਸ਼ੀ 'ਚ ਬੱਦਲਾਂ ਨੇ ਝੜੀ ਲਾ ਦਿੱਤੀ। 

ਸਾਉਣ ਝੜੀ 
ਵਗਦੀ ਪੌਣ ਸੰਗ 
ਕਵਿਤਾ ਘੜੀ। 

ਪ੍ਰੋ. ਦਵਿੰਦਰ ਕੌਰ ਸਿੱਧੂ 
(ਦੌਧਰ  -ਮੋਗਾ )

ਨੋਟ : ਇਹ ਪੋਸਟ ਹੁਣ ਤੱਕ 20 ਵਾਰ ਪੜ੍ਹੀ ਗਈ।