ਗੋਰੇ ਦਾ ਕਾਕਾ (ਚੋਕਾ)

ਕਾਕੇ ਦੇ ਨਾਲ

ਗੋਰਾ ਗਿਆ ਬਾਜ਼ਾਰ

ਮੁੜਿਆ 'ਕੱਲਾ 

ਕਿੱਥੇ ਛੱਡਿਆ ਕਾਕਾ

ਗੋਰੀ ਦਹਾੜੀ 

ਖੜ੍ਹਾ ਗੋਰਾ ਹੈਰਾਨ 

ਬੈਠਾ ਸੀ ਨਾਲ 

ਕਦੋਂ ਹੋਇਆ ਦੂਰ

ਕਿਸ ਨੂੰ ਪੁੱਛਾਂ 

ਮਿਲੀ ਨਾ ਉਗ -ਸੁੱਗ 

ਘੁਮਾਏ ਫੋਨ

ਹੁਣ ਘਰ ਵੀ ਖਾਲੀ 

ਰਾਤ ਪਈ ਤਾਂ 

ਚੱਲਾ ਪਿਆ ਲੱਭਣ 

ਚਲਾਈ ਕਾਰ

ਸੁੱਤਾ ਉਠਿਆ ਕਾਕਾ 

ਕਰਰ ਸੁਣ 

ਉੱਚੀ ਮਾਰੀ ਆਵਾਜ਼ 

ਡੈਡ ਚੱਲੋ ਵੀ

ਭੁੱਖ ਬੜੀ ਲੱਗੀਆ 

ਡੈਡ ਸੁਣ ਹੱਸਿਆ। 

ਕਮਲਾ ਘਟਾਔਰਾ 

ਯੂ. ਕੇ.

ਨੋਟ: ਇਹ ਪੋਸਟ ਹੁਣ ਤੱਕ 26 ਵਾਰ ਪੜ੍ਹੀ ਗਈ 

ਉਸ ਦੀ ਦੁਨੀਆਂ (ਚੋਕਾ)

ਖੇਤੋਂ ਮੁੜਕੇ
ਆਪਣੇ ਘਰ ਵੱਲ
ਮੈਂ ਤੁਰਿਆ ਸੀ
ਪਿੰਡ ਦੀ ਫਿਰਨੀ 'ਤੇ
ਓਹ ਬੈਠੀ ਸੀ
ਪਤਾ ਨਹੀਂ ਕਿਹੜੀ 
ਸੋਚ 'ਚ ਡੁੱਬੀ
ਡੱਕੇ ਨਾਲ ਵਾਹੁੰਦੀ
ਧਰਤੀ ਉੱਤੇ
ਘੁੱਗੂ- ਘਾਂਗੜੇ ਜਿਹੇ
ਗੁੰਮ ਸੁੰਮ ਜੀ
ਨਾ ਆਲੇ ਦੁਆਲੇ ਦੀ
ਕੋਈ ਖਬਰ
ਇੰਝ ਲੱਗਿਆ ਜਿਵੇਂ
ਦੋ ਪਲਾਂ ਵਿੱਚ
ਭਰ ਅੱਖਾਂ 'ਚ ਪਾਣੀ
ਓਹ ਰੋਵੇਗੀ
ਤੇ ਥਰਕਦੇ ਬੁੱਲ੍ਹ
ਮੁਸਕਰਾਹਟ
ਬਾਹਰ  ਸੁੱਟਣਗੇ
ਖੜਕੇ ਉਥੇ 

ਲੱਗਿਆ ਮੈਂ ਸੋਚਣ 

ਓਹ ਦੁਨੀਆਂ 

ਕਿਹੋ ਜਿਹੀ ਹੋਵੇਗੀ 

ਖੁਸ਼ੀਆਂ ਭਰੀ
ਜਾਂ ਪੀੜਾਂ ਦਾ ਪਰਾਗਾ
ਕੌਣ ਹੋਊਗਾ 

ਜੀਹਦੇ  ਨਾਲ ਹੋਊ 

ਇਹ ਵੰਡਦੀ
ਆਪਣੀਆਂ ਖੁਸੀਆਂ
ਤੇ ਅਪਣਾ ਦਰਦ|

ਹਰਜਿੰਦਰ ਢੀਂਡਸਾ 
(ਕੈਨਬਰਾ)

ਨਵਾਂ ਸਾਲ -2016 (ਚੋਕਾ)

ਚੜ੍ਹਿਆ ਸਾਲ

ਜਿਵੇਂ ਕੋਰਾ ਕਾਗਜ਼ 

ਨਵਾਂ ਨਕੋਰ

ਖੜਾ 

​ਅੱਜ ਬੂਹੇ 'ਤੇ 

ਦੇਖੇ ਰੀਝਾਂ ਲਾ 

ਜੀ ਆਇਆਂ ਕਹਿੰਦਾ 

ਕੋਈ ਬੁਲਾਵੇ

ਮੈਨੂੰ ਅੰਦਰ ਲੈ ਜਾ  

ਪੰਘੂੜਾ ਡਾਹ 

ਬੈਠਾਵੇ ਸਤਿਕਾਰੇ 

ਦੇਵਾਂ ਮੈਂ ਸ਼ੀਸ਼ਾ

ਕਰੀਏ ਸੰਕਲਪ  

ਹੋਵੇ ਓ ਪੂਰਾ 

ਰਹੇ ਨਾ ਦਹਿਸ਼ਤ 

ਸ਼ਾਂਤੀ ਪਸਰੇ

ਹੋਵੇ ਦੁੱਖ ਤੇ ਸੁੱਖ 

ਸਭ ਦਾ ਸਾਂਝਾ

ਰੋਂਦੇ ਨੂੰ ਵਰਾਈਏ 

ਹੱਸਦਾ ਤਾਂ ਹੱਸੀਏ। 

ਕਮਲਾ ਘਟਾਔਰਾ 

ਯੂ ਕੇ 
ਨੋਟ: ਇਹ ਪੋਸਟ ਹੁਣ ਤੱਕ 26 ਵਾਰ ਪੜ੍ਹੀ ਗਈ

ਨਾ ਸ਼ੁਕਰਾ (ਚੋਕਾ)

ਅੱਜ ਮਨੁੱਖ

ਕਿੰਨਾ ਏ ਨਾ ਸ਼ੁਕਰਾ

ਨਹੀਂ ਕਦਰ

ਕੁਦਰਤੀ ਦਾਤਾਂ ਦੀ

ਪਾਣੀ ਤੇ ਪੌਣ

ਹੋਈ ਏ ਜ਼ਹਰੀਲੀ

ਲੁੱਟੇ ਜੰਗਲ

ਗਏ ਗੁਆਚੇ ਰੁੱਖ

ਹੜ੍ਹਾਂ ਦੀ ਮਾਰ

ਝੱਲ ਰਿਹਾ ਸੰਸਾਰ

ਘਰੋਂ ਬੇਘਰ

ਹੋ ਰੁਲਦੀ ਦੁਨੀਆਂ

ਪ੍ਰਦੂਸ਼ਨ ਨੇ

ਕੀਤੇ ਅੰਬਰੀਂ ਛੇਦ

ਦੂਜਾ ਖੂੰਖਾਰ

ਖੂਨ ਪਿਆਸੇ ਬੰਦੇ

ਚਾਰ -ਚੁਫੇਰੇ

ਡਰਦੇ ਨਾ ਕਰਨੋ  
ਸਿਰ ਕਲਮ

ਹੁਣ ਦੇਸ਼ ਆਪਣਾ

ਲੱਗੇ ਬਿਗਾਨਾ  

ਉਜੜੇ ਘਰ ਵਾਰ
ਸੁਣੋ ਸਾਡੀ ਪੁਕਾਰ।

ਕਮਲਾ ਘਟਾਔਰਾ 
(ਯੂ. ਕੇ.)
ਨੋਟ: ਇਹ ਪੋਸਟ ਹੁਣ ਤੱਕ 55 ਵਾਰ ਪੜ੍ਹੀ ਗਈ।

ਪਾਣੀ ਬਚਾਓ (ਚੋਕਾ)

ਛੱਪੜ ਸੁੱਕੇ

ਸਭੇ ਲੱਜਾਂ ਅਲੋਪ
ਭੌਣੀਆਂ ਖਾਲੀ
ਕੀਤਾ ਸਮੇਂ ਕਰੋਪ
ਢਾਬਾਂ ਸੁੱਕੀਆਂ 
ਸੁੱਕੇ ਨਾਲੇ ਨਿਕਾਸੂ
ਪਿਆਸੇ ਪਸ਼ੂ 
ਨਲਕੇ ਨੇ ਬੇ-ਦਮ
ਪੰਛੀ ਹੌਂਕਣ 
ਕਈਆਂ ਛੱਡੇ ਦਮ
ਖੇਤਾਂ ਦੀ ਰੂਹ
ਟਿੰਡਾਂ ਵੇਖੋ ਰੁਲਣ
ਢਠੇ ਨੇ ਖੂਹ
ਜੰਗਾਲੇ  ਨੇ ਪਾੜਛੇ
ਲੋਹਾ ਵਿੱਕਦਾ 
ਫਿਰ ਕੌਡੀਆਂ ਭਾਅ
ਵੰਡਾਂ ਪਾਈਆਂ
ਵੇਖੇ ਹੱਥੇਲੀ ਜੱਟ 
ਲੱਭਾ ਨਾ ਕੱਖ 
ਆਓ ਸਭ 'ਕੱਠੇ ਹੋ
ਕਰੋ ਵਿਚਾਰ
ਪਾਣੀ ਏ ਸਾਡੀ ਜਾਨ 
ਕਰੋ ਅਧਾਰ
ਜੇ ਗਿਆ ਵੇਲਾ ਲੰਘ  
ਫਿਰ ਭੁੱਜੇਗੀ ਭੰਗ। 

ਇਂਜ: ਜੋਗਿੰਦਰ ਸਿੰਘ ਥਿੰਦ 
(ਸਿਡਨੀ)
ਨੋਟ: ਇਹ ਪੋਸਟ ਹੁਣ ਤੱਕ 36 ਵਾਰ ਪੜ੍ਹੀ ਗਈ।

ਚੀਸ ਕਲੇਜੇ (ਚੋਕਾ)

ਇੱਕ ਸੋਚ ਸੀ 

ਮੈਨੂੰ ਜੋ ਕਹਿ ਗਈ 

ਮੇਰੀ ਮੰਜ਼ਿਲ

ਪਿੱਛੇ ਹੀ ਰਹਿ ਗਈ

ਸੁੱਕਾ ਹੈ ਰੁੱਖ 

ਮਾਰੂਥਲ 'ਨ੍ਹੇਰੀਆਂ 

ਹੁਣ ਤਾਂ ਜਾਨ 

ਲੱਬਾਂ 'ਤੇ ਬਹਿ ਗਈ 

ਦੁੱਖ ਦਰਦ 

ਵੰਡਾਓਣ ਵਾਲਿਆ 
ਓਏ ਕਿੱਥੇ ਤੂੰ 

ਇੱਕ ਚੀਸ ਕਲੇਜੇ 
ਹਾਂ, ਰਹਿ ਗਈ 

ਵੇਖ ਆਸਾਂ ਦੀ ਲਾਟ 
 ਓ 'ਦਿਲਜਲੀ' 

ਗਮ ਖਾਰ ਬਣ ਕੇ 
ਧੁਰ ਅੰਦਰ 
ਕਿਤੇ ਜੋ ਲਹਿ ਗਈ 
ਆਪਣੀ ਅੱਗ 

ਹੁਣ ਆਪ ਸੇਕ ਤੂੰ 

ਤੇਰੇ ਅੰਦਰ 

ਭਾਵੇਂ ਭੁੱਬਲ ਬਾਕੀ 

ਦੱਬੀ ਹੀ ਰਹਿ ਗਈ। 

ਇੰ :ਜੋਗਿੰਦਰ ਸਿੰਘ 'ਥਿੰਦ'
(ਸਿਡਨੀ)
ਨੋਟ: ਇਹ ਪੋਸਟ ਹੁਣ ਤੱਕ 27 ਵਾਰ ਪੜ੍ਹੀ ਗਈ।

ਗਰੀਬ ਦੀ ਜ਼ਿੰਦਗੀ (ਚੋਕਾ)

ਸੁਣ ਜ਼ਿੰਦਗੀ 

ਮੇਰੇ ਸਾਹਮਣੇ ਹੈ 

ਗੁੰਝਲ ਖੜ੍ਹੀ

ਤੂੰ  ਹੀ ਦੱਸ ਤਾਂ ਭਲਾ

ਟੁਕੜਿਆਂ 'ਚ 

ਕਿਓਂ ਮਿਲ਼ਦੀ ਖੁਸ਼ੀ

ਇਓਂ ਹੀ ਹੁੰਦਾ 

ਕਿਓਂ ਹਮੇਸ਼ਾਂ ਭਲਾ

ਗਮ ਦਰਿਆ 

ਨੱਕੋ -ਨੱਕ ਵਹਿੰਦਾ 

ਲੱਭਦੀ ਨਹੀਂ 

ਕਿਤੇ ਖੁਸ਼ੀ ਅੜਿਆ 

ਛਾਣ ਮਾਰਿਆ 

ਨਿੱਤ ਮੈਂ ਜ਼ਰਾ-ਜ਼ਰਾ 

ਚੱਲ ਮੰਨ ਲੈ 

ਏਸੇ ਦਾ ਨਾਂ ਜ਼ਿੰਦਗੀ 

ਤਾਂ ਇੱਕ ਹੋਰ 

ਉਲਝਣ ਆ ਖੜ੍ਹੀ

ਘਰ ਗਰੀਬਾਂ 

ਗਮ ਠਾਠਾਂ ਮਾਰਦਾ 

ਕਿਓਂ ਉਨ੍ਹਾਂ ਨੂੰ 

ਜਿਉਣ ਅਧਿਕਾਰ 

ਨਹੀਂ ਮਿਲਦਾ 

ਕਿਓਂ ਨਹੀਂ ਮਿਲਦਾ 

ਖੁਸ਼ੀ ਤੋਹਫ਼ਾ 

ਬੀਤ ਜਾਂਦੀ ਉਮਰ 

ਗੁਰਬੱਤ 'ਚ 

ਹਰ ਦੁੱਖ ਪੀੜਾ ਨੂੰ 

ਆਪੇ ਸਹਿੰਦੇ 

ਦੂਜਿਆਂ ਖੁਸ਼ ਦੇਖ 

ਬੱਸ ਖੁਸ਼ ਹੋ ਲੈਂਦੇ। 

ਵਰਿੰਦਰਜੀਤ ਸਿੰਘ ਬਰਾੜ 

(ਬਰਨਾਲਾ) 
ਨੋਟ: ਇਹ ਪੋਸਟ ਹੁਣ ਤੱਕ 41 ਵਾਰ ਪੜ੍ਹੀ ਗਈ। 

ਅੰਨ-ਹੰਡਾਈ ਜਿੰਦ (ਚੋਕਾ)

ਜਾਣ ਲੱਗਿਆਂ 

ਉਸ ਵਾਅਦਾ ਕੀਤਾ

ਮੁੜਾਂਗਾ ਛੇਤੀ    

ਚੂੜੇ ਵਾਲੀ ਉਡੀਕੇ

ਬੂਹੇ 'ਤੇ ਅੱਖਾਂ 

ਪਰ ੳੁਹ ਅਲੋਪ

ਥੌਹ ਨਾ ਪਤਾ

ਗਿਆ ਸੀ ਨਜ਼ਾਇਜ 

ਮੁ੍ੜ ਨਾ ਹੋਵੇ

ਕਰੇ ਕਿਵੇਂ ਸ਼ਿੰਗਾਰ 

ਮਾਹੀ ਬਾਹਰ

ਪੱਤਝੜ-  ਬਹਾਰਾਂ

ਐਵੇਂ ਲੰਘੀਆਂ 

ਬੁੱਲ੍ਹੀ ਜੰਮੀ ਸਿੱਕਰੀ 

ਬਾਹਾਂ ਸੁੱਕੀਆਂ 

ਰਹੀ ਨਾ ਮੁਟਿਆਰ 

ਕਹਿਰ ਕਮਾ

ਮੁੜਿਆ ਸਾਲਾਂ ਪਿੱਛੋਂ 

ਪੈਸੇ ਲੈ ਕਮਾ 

ਜੋਬਨ ਲਿਆ ਗਵਾ 

ਦੱਸ ਕੀ ਏ ਖੱਟਿਆ। 

 ਇੰਜ: ਜੋਗਿੰਦਰ ਸਿੰਘ "ਥਿੰਦ"

  (ਸਿਡਨੀ)
ਨੋਟ : ਇਹ ਪੋਸਟ ਹੁਣ ਤੱਕ 18 ਵਾਰ ਪੜ੍ਹੀ ਗਈ। 

ਲੰਞੇ ਡੰਗ ਬੱਤੀ (ਚੋਕਾ)

ਲੰਞੇ ਡੰਗ ਹੈ 

ਹੁਣ ਆਉਂਦੀ ਬੱਤੀ

ਸਾਨੂੰ ਬੜਾ ਹੀ 

ਸਤਾਉਂਦੀ ਏ ਬੱਤੀ

ਲੰਮੀ ਫਰਲੋ 

ਜਦ ਮਾਰ ਕੇ ਜਾਂਦੀ

ਥਓ-ਪਤਾ ਨਾ 

ਸਾਨੂੰ ਦੱਸ ਕੇ ਜਾਂਦੀ

ਪੂਰੇ ਵੋਲਟ 

ਇਹ ਕਦੇ ਨਾ ਆਵੇ

ਵਾਂਗ ਦੀਵਿਆਂ 

ਫਿਰ ਲਾਟੂ ਜਗਾਵੇ

ਅਵਾਜ਼ਾਂ ਘੂੰ-ਘੂੰ  

ਸਭ ਪੱਖੇ ਚੱਲਦੇ 

ਫਰ ਭੋਰਾ ਨਾ 

ਕਦੇ ਅੱਗੇ ਹਿੱਲਦੇ 

ਤੇਰਾ ਜਾ-ਜਾ ਕੇ 

ਆਉਣਾ ਨੀ ਅੜਿਆ

ਟੀ.ਵੀ. ਫਰਿੱਜ਼ 

ਵੇਖ ਸਾਡਾ ਸੜਿਆ

ਨਿੱਕੜੇ ਸਾਰੇ 

ਬੰਨ ਕੇ ਦੋਵੇਂ ਹੱਥ

ਆਖਣ ਭਾਈ 

ਨਾ ਲਾਵੋ ਹੁਣ ਕੱਟ

ਕਰਨੀ ਅਸੀਂ 

ਅੱਜ ਖੂਬ ਪੜ੍ਹਾਈ

ਕੱਲ ਨੂੰ ਸਾਡਾ 

ਵੱਡਾ ਪਰਚਾ ਭਾਈ

ਹਾਲ ਏ ਮੰਦਾ 

ਬਿਜਲੀ ਬੋਰਡ ਦਾ 

ਕਰਦੇ ਸਾਰੇ 

ਕੋਈ ਗੋਰਖ ਧੰਦਾ 

ਚਾਰ ਕੁ ਘੰਟੇ 

ਹੁਣ ਬਿਜਲੀ ਆਵੇ

ਸਾਡੀ ਜਾਨ ਨੂੰ 

ਫਿਰ ਸੁੱਕਣੀ ਪਾਵੇ 

ਮੁੜ ਉਹੀਓ 

ਕਾਲੀ -ਬੋਲੀ ਰਾਤ ਏ 

ਨਾ ਮੁੱਕਦੀ ਬਾਤ ਏ ! 

ਵਰਿੰਦਰਜੀਤ ਸਿੰਘ ਬਰਾੜ 

(ਬਰਨਾਲਾ)

ਨੋਟ: ਇਹ ਪੋਸਟ ਹੁਣ ਤੱਕ 31 ਵਾਰ ਪੜ੍ਹੀ ਗਈ। 

ਕਿਰਤੀ ਕਿਸਾਨ (ਚੋਕਾ)

ਕਣਕ ਪੱਕੀ

ਭਿਓਂ -ਭਿਓਂ ਕੇ ਨਾੜ 
ਵੱਟਿਆ ਬੇੜ
ਦਾਤਰੀਆਂ ਚੱਲੀਆਂ 
ਚਾਦਰੇ ਲਾਹ 
ਬੰਨ੍ਹ -ਬੰਨ੍ਹ ਭਰੀਆਂ 
ਚੁੱਕ ਧਰੀਆਂ 
ਜਾ ਲਾਏ ਖਲਵਾੜ 
ਫਲ੍ਹੇ ਪਾ ਗਾਹੀ
ਗੋਲ ਧੱੜਾਂ ਲਾਈਆਂ
ਰਾਖੀ ਵੀ ਕੀਤੀ
ਤੰਗਲੀ ਨਾਲ ਉਡਾ
ਤੂੜੀ ਵੱਖਰੀ 
ਸਾਂਭੀ ਲਾ ਕੇ ਮੂਸਲ 
ਕੱਢੇ ਨੇ ਦਾਣੇ
ਬੋਰੀਆਂ ਭਰ ਭਰ
ਲੱਦ ਗੱਡਿਆਂ 
ਮੰਡੀ ਢੇਰ ਲਗਾਏੇ
ਵੱਟ ਕੇ ਪੈਸੇ
ਸ਼ਾਹ ਦੇ ਪੱਲੇ ਪਾਏ
ਕਦੇ ਹੱਥ ਨਾ ਆਏ। 


ਇੰਜ : ਜੋਗਿੰਦਰ  ਸਿੰਘ ਥਿੰਦ
     (ਅੰਮ੍ਰਿਤਸਰ--ਸਿਡਨੀ) 
ਨੋਟ: ਇਹ ਪੋਸਟ ਹੁਣ ਤੱਕ 56 ਵਾਰ ਪੜ੍ਹੀ ਗਈ ਹੈ । 

ਰਾਹ ਕੰਡਿਆਲੇ (ਚੋਕਾ)

ਘੁੱਪ ਹਨ੍ਹੇਰਾ 

ਤੇ ਰਾਹ ਕੰਡਿਆਲੇ 
ਸਾਥੀ ਨਾ ਕੋਈ 

ਭਿੱਜੀਆਂ ਨੇ ਪਲਕਾਂ 

ਚੱਲਦੇ ਰਹੇ 

ਥੱਕੇ ਪੈਰ ਜ਼ਖ਼ਮੀ 

ਕਿਵੇਂ ਲੱਭਾਂਗੇ 

ਲਾਪਤਾ ਪਿੰਡ ਆਪਾਂ 

ਕੀਤੀ ਸੀ ਦੁਆ 

ਪਰ ਨਾ ਜਾਣੇ ਕਿਵੇਂ 

ਕੰਡੇ ਹੀ ਬਣੀ 

ਕੀਤੀ ਕੇਸਰ ਖੇਤੀ 

ਸ਼ਰਾਪੀ ਗਈ 

ਬਣੀ ਬੈਠੀ ਥੋਹਰ 

ਹੋਏ ਆਪਣੇ 

ਦੁਆ ਨਾਲ ਜ਼ਖ਼ਮੀ 

ਸਰਾਪ ਦੇਵੋ 

ਕਰਦੇ ਸੁਆਗਤ 

ਹੰਝੂ ਜੋ ਪੂੰਝੇ 

ਲੱਗਦਾ ਜ਼ਹਿਰੀਲਾ 

ਸਦਾ ਭਾਉਂਦਾ 

ਇਨ੍ਹਾਂ ਮਨ ਦਾ ਮੈਲਾ 

ਆਓ ਸਮੇਟੋ 

ਸਭ ਸ਼ੁੱਭਇੱਛਾਵਾਂ 

ਨਹੀਂ ਮੁੜਨਾ 

ਕਹਿਣ ਨੂੰ ਘਰ ਨੇ 

ਜੋ ਹਿੰਸਕ ਗੁਫਾਵਾਂ। 

ਰਾਮੇਸ਼ਵਰ ਕੰਬੋਜ 'ਹਿੰਮਾਂਸ਼ੂ'

( ਨਵੀਂ ਦਿੱਲੀ)

ਹਿੰਦੀ  ਤੋਂ ਅਨੁਵਾਦ 

ਡਾ. ਹਰਦੀਪ ਕੌਰ ਸੰਧੂ 
ਨੋਟ: ਇਹ ਪੋਸਟ ਹੁਣ ਤੱਕ 39 ਵਾਰ ਪੜ੍ਹੀ ਗਈ। 

ਨਸ਼ੇ ਵਿਰੁੱਧ ਧਰਨਾ (ਚੋਕਾ)

ਨਸ਼ੇ ਵਿਰੁੱਧ 

ਧਰਨੇ ਦੀ ਤਿਆਰੀ 

ਪਿੰਡ ਦੀ ਜੂਹ 

ਕੱਠੇ ਹੋਏ ਅਮਲੀ
ਨਸ਼ੇ ਦੀ ਤੋੜ 

ਸਰਕਾਰੀ ਧਰਨਾ 

ਬੱਸ 'ਚ ਬੈਠੇ 

ਬੱਸ ਵਿੱਚ ਚੱਲਿਆ 

ਨਸ਼ੇ ਦਾ ਦੌਰ 

ਡੱਬ ਵਿੱਚ ਬੋਤਲ 

ਜੇਬ 'ਚ ਭੁੱਕੀ 

ਆਖਿਆ ਸਰਪੰਚ 

ਲਾਓ ਨਾਹਰਾ
ਨਸ਼ੇ ਕਰਨੇ ਬੰਦ 

ਉੱਚੀ ਹੇਕ 'ਚ 

ਅਮਲੀਆਂ ਲਾਇਆ 

ਪਿੰਡ ਚ ਚਿੱਟਾ 

ਵੜਨ ਨਹੀਂ ਦੇਣਾ 

ਠੇਕਾ ਸ਼ਰਾਬ 

ਪਿੰਡ ਤੋਂ ਬਾਹਿਰ 

ਅਸੀਂ ਦੇਵਾਂਗੇ

ਬਾਡਰ 'ਤੇ ਪਹਿਰਾ 

ਮਾਰੇ ਬੜਕਾਂ 

ਚੱਕ ਦਿਆਂਗੇ ਫੱਟੇ
ਨਸ਼ੇ 'ਚ ਟੁੰਨ 

ਸਰਪੰਚ ਹੱਸਿਆ 

ਖਚਰਾ ਹਾਸਾ 

ਕਰ ਲਈ ਕਮਾਈ 

ਮਨ 'ਚ ਸੋਚੇ 

ਚੇਅਰਮੈਨੀ ਪੱਕੀ 

ਪੰਚਾਇਤ ਸੰਮਤੀ|

ਹਰਜਿੰਦਰ ਢੀਂਡਸਾ 

(ਕੈਨਬਰਾ)
ਨੋਟ: ਇਹ ਪੋਸਟ ਹੁਣ ਤੱਕ 06 ਵਾਰ ਪੜ੍ਹੀ ਗਈ। 

ਲੋਹੜੀ(ਚੋਕਾ)

ਲੋਹੜੀ ਆਈ
ਮਿੱਠੇ ਬੋਲ ਸੁਣੀਂਦੇ 
ਗਲੀ ਮੁਹੱਲੇ
ਮੂੰਗਫਲੀ ਮਰੂੰਡਾ 
ਤਿੱਲ ਰਬੜੀ
ਖਾਓ ਫੁੱਲੇ-ਫੁੱਲੀਆਂ
ਆਓ ਮਿੱਤਰੋ
ਲੋਹੜੀ ਮਚਾਈਏ
ਪਾਥੀਆਂ ਜੋੜ
ਸਭ ਲੋਹੜੀ ਸੇਕੋ
ਅੱਜ ਦੀ ਸ਼ਾਮ
ਦਿਨ ਪੋਹ ਆਖਰੀ
ਵੰਨ-ਸੁਵੰਨੇ 
ਲੋਕ ਘੁੰਮਣ ਮੇਲੇ 
ਮਾਘੀ ਮੁਕਤਸਰ।

ਅੰਮ੍ਰਿਤ ਰਾਏ (ਪਾਲੀ) 
(ਫਾਜ਼ਿਲਕਾ)

ਨੋਟ: ਇਹ ਪੋਸਟ ਹੁਣ ਤੱਕ 05 ਵਾਰ ਪੜ੍ਹੀ ਗਈ। 

ਤੇਰੀ ਏ ਚੁੱਪ (ਚੋਕਾ)

ਤੇਰੀ ਏ ਚੁੱਪ

ਨਹੀਂ ਤੇਰੀ ਦਲੇਰੀ 

ਹੁਣ ਨਾ ਛੁਪ

ਹੁਣ ਤੇਰੀ ਏ ਚੁੱਪ 

ਕਰੂ ਬੀਮਾਰ 

ਦੇਉਗੀ ਮੈਨੂੰ ਮਾਰ 

ਤੇਰੀ ਏ ਚੁੱਪ 

ਖੜੇ ਕਰੇ ਸਵਾਲ 

ਲੱਭ ਜਵਾਬ 

ਦੂਰ ਤਕ ਜਾਏਗੀ 

ਤੇਰੀ ਏ ਚੁੱਪ 

ਸਭ ਕੁਝ ਖਾਵੇਗੀ 

ਤੇਰੀ ਏ ਚੁੱਪ 

ਕਰਦੀ ਪਰੇਸ਼ਾਨ 

ਤੂੰ  ਗੱਲ ਜਾਣ 

ਨਹੀ ਕੋਈ ਰਿਵਾਜ 

ਤੇਰੀ ਏ ਚੁੱਪ

ਕਰ  ਇਲਾਜ 

ਵੇਖ ਤੇਰੀ ਏ ਚੁੱਪ 

ਨਾ ਹੁੰਦੀ ਝੱਲ 

ਨਾ ਉਦਾਸੀ ਦਾ ਵੱਲ 

ਨਹੀਂ ਹੈ ਕੋਈ ਹੱਲ। 

ਡਾ. ਸ਼ਿਆਮ ਸੁੰਦਰ ਦੀਪਤੀ 

(ਅੰਮ੍ਰਿਤਸਰ) 

ਪੰਜਾਬੀ ਸੱਭਿਅਤਾ (ਚੋਕਾ)

ਭੁੱਲ ਗਈਆਂ 

ਅੱਜ ਦੀਆਂ ਕੁੜੀਆਂ

ਸਿਰਾਂ 'ਤੇ ਲੈਣੀ 

ਰੰਗਲੀਆਂ ਚੁੰਨੀਆਂ

ਨਾ ਦਿੱਸਦੀਆਂ  

ਕਿਧਰੇ ਹੁਣ ਸਾਨੂੰ 

ਗੁੱਤਾਂ ਗੁੰਦੀਆਂ

ਨਾ ਹੀ ਓਹ ਝੂਟਣ 

ਪਿੱਪਲੀਂ ਪੀਂਘਾਂ

ਨਾ ਰਲ਼ ਲਾਉਂਦੀਆਂ 

ਹੁਣ ਕਿਧਰੇ 

ਕਦੇ ਤੀਆਂ -ਤ੍ਰਿੰਝਣ 

ਛੱਡਿਆ ਓਨ੍ਹਾਂ 

ਪੰਜਾਬੀ ਪਹਿਰਾਵਾ

ਰੰਗ -ਬਿਰੰਗੀ 

ਸਲਵਾਰ-ਕਮੀਜ਼ਾਂ

ਛੱਡ ਪਾਵਣ 

ਚੰਦਰੀਆਂ ਜਿਹੀਆਂ 

ਭੀੜੀਆਂ ਜੀਨਾ  

ਵਿਆਹ ਪਾਰਟੀਆਂ

ਪੀਣ ਸ਼ਰਾਬਾਂ

ਸ਼ਾਨ ਸਮਝਦੀਆਂ 

ਜਾਵਣ ਪੱਬਾਂ

ਪੰਜਾਬੀ ਸੱਭਿਅਤਾ

ਕਿੱਥੇ ਓ ਰੱਬਾ

ਗੁਆਚੀ ਸੱਭਿਅਤਾ

ਹੁਣ ਮੈਂ ਕਿੱਥੇ ਲੱਭਾਂ ?

ਵਰਿੰਦਰਜੀਤ ਸਿੰਘ 

(ਬਰਨਾਲਾ) 

ਨੋਟ: ਇਹ ਪੋਸਟ ਹੁਣ ਤੱਕ 25 ਵਾਰ ਖੋਲ੍ਹ ਕੇ ਵੇਖੀ ਗਈ। 

ਕੁੜੀਆਂ -ਚਿੜੀਆਂ (ਚੋਕਾ)

ਵਗਦੀ ਪਈ 

ਕੋਈ ਪੌਣ ਪੁਰੇ ਦੀ 
ਸਹਿਕਦੇ ਨੇ
ਅਸਾਡੇ ਅੱਜ ਸਾਹ 
ਸੁਣ ਨੀ ਪੌਣੇ 
ਉੱਡ -ਪੁੱਡ ਜਾਣੀਏ 
ਅੱਜ ਤੂੰ ਸਾਨੂੰ 
ਆਪਣੇ ਨਾਲ ਮਿਲਾ 
ਲੰਬੀ ਉਡਾਰੀ 
ਭਰ ਜਾਣ  ਚਿੜੀਆਂ 
ਸਾਨੂੰ ਰੱਖਿਆ 
ਕਿਉਂ ਹੈ ਪਿੰਜਰੇ ਪਾ 
ਚਿੜੀਆਂ ਆਖੋ 
ਨਾ ਸਾਨੂੰ ਓਏ ਲੋਕਾ 
ਸਾਥੋਂ ਉੱਡਿਆ 
ਫਿਰ ਕਿਤੇ ਨਾ ਜਾਹ 
ਉੱਡਣਹਾਰੇ 
ਖਿਆਲ ਅਸਾਡੜੇ 
ਵੇਖੋ ਕਿਵੇਂ ਨੀ 
ਬਾਗ਼ੀ ਹੋ -ਹੋ ਜਾਵਣ 
ਸੋਚ ਪਿਟਾਰੀ 
ਦਫ਼ਨ ਨੀ ਕਰਦੇ 
ਸੁਣ ਨਾਲੇ ਤੂੰ 
ਉੱਚੀ ਨਾ ਮਾਰੀਂ ਧਾਹ 
ਹੋਈ ਦਲਾਲੀ 
ਬਾਬਲ ਦੇ ਵਿਹੜੇ 
ਗਊ ਵਾਂਗਰ 
ਤੋਲੇ ਨਾਲੇ ਪਰਖੇ 
ਮਾਹੀਆ ਆਵੇ 
ਲੈ ਜਾਂਵਦਾ ਨੱਥ ਪਾ 
ਅੱਜ ਵਗਦੀ 
ਕੋਈ ਪੌਣ ਪੁਰੇ ਦੀ 
ਸਹਿਕਦੇ ਨੇ ਸਾਹ। 

ਪ੍ਰੋ . ਦਵਿੰਦਰ ਕੌਰ ਸਿੱਧੂ 
(ਦੌਧਰ )
ਨੋਟ: ਇਹ ਪੋਸਟ ਹੁਣ ਤੱਕ 25 ਵਾਰ ਖੋਲ੍ਹ ਕੇ ਵੇਖੀ ਗਈ। 

ਮਾਂ ਦੀ ਪਹੁੰਚ (ਚੋਕਾ) - ਮਾਂ ਦਿਵਸ 'ਤੇ ਵਿਸ਼ੇਸ਼

ਮਾਂ ਨੂੰ ਆਪਣੇ ਦਿਲ ਦੇ ਅਹਿਸਾਸ ਦੱਸਣ ਲਈ ਮੈਨੂੰ ਕਦੇ ਸ਼ਬਦਾਂ ਦੀ ਲੋੜ ਨਹੀਂ ਪਈ। ਕਿਉਂਕਿ..............

ਜਦੋਂ ਕਦੇ ਵੀ
ਮੇਰਾ ਦੁੱਖ-ਦਰਦ
ਮੇਰੀ ਆਪਣੀ
ਸ਼ਬਦ ਪਕੜ ਤੋਂ
ਪਰ੍ਹੇ ਹੋਇਆ
ਓਦੋਂ-ਓਦੋਂ ਮੇਰੀ ਮਾਂ
ਮਲਕ ਜਿਹੇ
ਕੋਲ਼ ਆ ਖੜ੍ਹੋਂਦੀ ਏ
ਤੇ ਹੌਲ਼ੇ ਜਿਹੇ
ਥੱਪ-ਥਪਾਉਂਦੀ ਏ
ਮੇਰੀ ਪਿੱਠ ਨੂੰ
ਪਤਾ ਨਹੀਂ ਕਿਵੇਂ ਮਾਂ
ਜਾਣ ਲੈਂਦੀ ਏ
ਅਣਕਿਹਾ ਦਰਦ 
ਸੱਚ ਹੀ ਤਾਂ ਹੈ
ਕੋਈ ਨਹੀਂ ਜਾਣਦਾ
ਮਾਂ ਦੀ ਪਹੁੰਚ
ਅੱਖਰਾਂ ਤੋਂ ਉਤਾਂਹ
ਸ਼ਬਦਾਂ ਤੋਂ ਪਰ੍ਹੇ ਹੈ !

ਡਾ. ਹਰਦੀਪ ਕੌਰ ਸੰਧੂ 
ਨੋਟ: ਇਹ ਪੋਸਟ ਹੁਣ ਤੱਕ 30 ਵੇਖੀ ਗਈ।