ਕੇਹਾ ਸਾਵਣ / ਦੋ ਗੱਲਾਂ

ਕੇਹਾ ਸਾਵਣ

ਕੱਲਮ-ਕੱਲੀ

ਆਪਣਾ ਕੋਈ ਵੀ ਨਾ 

ਬੇਦਰਦੀਆ

ਬਣ ਨਿਰਮੋਹਿਆ

ਕਿੱਥੇ ਬੈਠਾ ਤੂੰ

ਹੁਣ ਘਰ ਮੁੜ ਆ 

ਕੇਹਾ ਸਾਵਣ

ਬਿਨ ਤੇਰੇ ਬਾਝੌਂ ਵੇ

ਮੈਂ ਕੁਰਲਾਵਾਂ ਬੀਬਾ।

                           

ਦੋ ਗੱਲਾਂ

ਆ ਮਿਲ ਮੈਨੂੰ 

ਬਣ ਰਾਹਾਂ ਦਾ ਪਾਂਧੀ

ਖੜ੍ਹੀ ਉਡੀਕਾਂ

ਤੇਰੇ ਬਾਝ ਇੱਕਲੀ

ਮਹਿਰਮਾਂ ਵੇ

ਅੱਜ ਮੈਂ ਮਾਰਾਂ ਲੀਕਾਂ 

ਕੁਝ ਨਾ ਸੁੱਝੇ

ਬਿਨ ਤੇਰੇ ਸੱਜਣਾ

ਆ ਪਾ ਜਾ ਫ਼ੇਰਾ

ਮੇਰੇ ਤੂੰ ਸਾਹੀਂ ਵਸੇਂ

ਦੱਸ ਜਾ ਮੈਨੂੰ

ਕਿੰਝ ਦੂਰ ਰਹਾਂ ਮੈਂ

ਪਿਆਰ ਦੀਆਂ 

ਚੱਲ ਦੋ ਗੱਲਾਂ ਕਰੀਏ

ਅੱਖਾਂ ਵਿੱਚ ਅੱਖਾਂ ਪਾ।

ਨਿਰਮਲ ਸਤਪਾਲ

(ਲੁਧਿਆਣਾ) 

(ਨੋਟ: ਇਹ ਪੋਸਟ ਹੁਣ ਤੱਕ 16 ਵਾਰ ਖੋਲ੍ਹ ਕੇ ਪੜ੍ਹੀ ਗਈ ਹੈ)

ਕੋਇਲ ਕੂਕੇ

ਸਾਉਣ ਮਹੀਨਾ ਲੰਘ ਚੱਲਿਆ ਹੈ। ਮਾਹੀ ਦੀ ਉਡੀਕ 'ਚ ਬੈਠੀ ਮੁਟਿਆਰ ਦੇ ਹਾਵ-ਭਾਵ ਕੁਝ ਇਸ ਤਰਾਂ ਪੇਸ਼ ਕੀਤੇ ਹਨ ਸਾਡੀ ਹਾਇਕੁ ਕਲਮ ਨੇ !

1.

ਪੀਂਘ ਹੁਲਾਰਾ

ਉੱਡਾਂ ਅਸਮਾਨੀ ਵੇ

ਕੌਣ ਸੰਭਾਲ਼ੇ ।

2.

ਕੋਇਲ ਕੂਕੇ

ਬੱਦਲ ਗਰਜਣ

ਬੈਠੀ ਉਦਾਸ ।

3.

ਕਾਗ ਉਡਾਵਾਂ

ਸੋਹਣਿਆਂ ਸੱਜਣਾਂ

ਔਸੀਆਂ ਪਾਵਾਂ ।

ਨਿਰਮਲ ਸਤਪਾਲ

(ਲੁਧਿਆਣਾ) 

ਮੁਥਾਜ ਹਾਂ ਮੈਂ

ਮਾਂ ਕਿੱਥੇ ਗਈ

ਤੂੰ ਚੁੱਪ-ਚੁਪੀਤੇ ਹੀ

ਜੇ ਜਾਣਾ ਹੀ ਸੀ 

ਠਿਕਾਣਾ ਦੱਸ ਜਾਂਦੀ

ਮੁਥਾਜ ਹਾਂ ਮੈਂ 

ਮੈਂ ਤੇਰੇ ਸਾਥ ਬਿਨਾਂ।

ਤੇਰਾ ਆਲ੍ਹਣਾ

ਹੁਣ ਆਪਣਾ ਨਹੀਂ

ਬੁੱਢਾ ਬਾਪ ਵੀ

ਪ੍ਰਾਹੁਣਾ ਲੱਗਦਾ ਹੈ

ਹਰ ਥਾਂ ਅੱਖਾਂ

ਤੈਨੂੰ ਭਾਲ਼ਦੀਆਂ ਨੇ।

ਤੇਰਾ ਚਿਹਰਾ

ਨਜ਼ਰੀਂ ਨਹੀਂ ਪੈਂਦਾ 

ਹਾਏ ਓ ਰੱਬਾ

ਕਿਉਂ ਖੋਹੰਦਾ ਏਂ ਮਾਂ

ਹੁਣ ਦੁਨੀਆਂ 

ਚੱਗੀ ਨਹੀਂ ਲੱਗਦੀ।

ਮੇਰੇ ਲਈ ਤਾਂ

ਰੱਬ ਤੇ ਮਾਂ ਇੱਕ ਸੀ

ਲੱਭਦੀ ਫਿਰਾਂ

ਅੱਜ ਰੱਬ ਤੇ ਤੈਨੂੰ 
ਗੁਆਚ ਗਏ

ਇੱਕਲਿਆਂ ਛੱਡ ਕੇ

ਜਿਗਰ ਦੇ ਟੋਟੇ ਨੂੰ ।

ਨਿਰਮਲ 'ਸਤਪਾਲ'

(ਲੁਧਿਆਣਾ)  

ਨੋਟ: ਇਹ ਪੋਸਟ ਹੁਣ ਤੱਕ 311 ਵਾਰ ਖੋਲ੍ਹ ਕੇ ਪੜ੍ਹੀ ਗਈ। 

ਯਾਦ ਤੇਰੀ

ਹਾਇਕੁ ਲੋਕ ਹੁਣ ਇੱਕ ਪਰਿਵਾਰ ਹੈ ਤੇ ਪਰਿਵਾਰ ਦੇ ਜੀਆਂ ਦੇ ਸੁੱਖ-ਦੁੱਖ ਸਾਂਝੇ ਹੁੰਦੇ ਹਨ। ਜਦੋਂ ਕਿਸੇ ਘਰ ਦੇ ਜੀਅ ਨੂੰ ਕੋਈ ਦੁੱਖ ਹੋਵੇ ਤਾਂ ਬਾਕੀ ਦੇ ਟੱਬਰ ਨੂੰ ਕਦੋਂ ਚੈਨ ਆਉਂਦਾ। ਕੁਝ ਇਹੋ ਜਿਹਾ ਹੀ ਹੋਇਆ ਪਿੱਛਲੇ ਦਿਨੀਂ। ਜਦੋਂ ਅਸੀਂ ਥਿੰਦ ਜੀ ਦੇ ਅਸਹਿ ਦਰਦ ਨੂੰ ਵੰਡਾਉਣ ਦੀ ਕੋਸ਼ਿਸ਼ 'ਚ ਸਾਂ ਤਾਂ ਸਾਡੀ ਇੱਕ ਸੰਵੇਦਨਸ਼ੀਲ ਕਲਮ ਇਓਂ ਬੋਲ ਪਈ। 

"ਥਿੰਦ ਜੀ ਅਤੇ ਉਨ੍ਹਾਂ ਦੇ ਪਰਿਵਾਰ ਦੀ ਅਸਹਿ ਪੀੜ ਨੂੰ ਸਮਝ ਸਕਦੀ ਹਾਂ, ਪ੍ਰਮਾਤਮਾ ਇਸ ਵਿਛੋੜੇ ਨੂੰ ਸਹਿਣ ਕਰਨ ਦੀ ਤਾਕਤ ਬਖਸ਼ੇ। ਅੱਜ ਤਾਂ ਮੇਰੀ ਕਲਮ ਵੀ ਭਾਵਕ ਹੋ ਗਈ ਹੈ।"

ਉਹ ਦਿਨ ਸੀ
ਕਿੰਨਾ ਹੀ ਮਨਹੂਸ
ਵਿਛੜਿਆ ਸੀ 
ਤੂੰ ਪਰਿਵਾਰ ਨਾਲੋਂ
ਚਲਾ ਗਿਆ ਸੀ
ਦੂਰ-ਦੁਰੇਡੇ ਰਾਹ 
ਤਰਸ ਰਹੀ
ਤੇਰੀ ਮਾਂ ਦੀ ਬੁੱਕਲ਼ 
ਰਹੀ ਨਾ ਚਾਹ
ਬਾਬਲ ਦੀ ਕੋਈ ਵੀ
ਹਾਉਕੇ ਭਰੇ
ਜੀਵਣ ਸਾਥਣ ਵੀ
ਕਿਲਕਾਰੀਆਂ 
ਗੁਆਚ ਨੇ ਗਈਆਂ 
ਕਿੱਥੇ ਜਾ ਬੈਠਾ
ਨਿਰਮੋਹਿਆ ਬਣ
ਨਹੀਂ ਭਾਉਂਦੀ 
ਇਹ ਦੁਨੀਆਂ ਸਾਨੂੰ 

ਨਹੀਂ ਲੱਭਦੇ

ਪੈੜਾਂ ਦੇ ਨਿਸ਼ਾਨ ਵੀ 

ਨਹੀਂ ਹੁੰਦਾ ਸਬਰ ।

ਨਿਰਮਲ ਸਤਪਾਲ

(ਲੁਧਿਆਣਾ) 
ਨੋਟ: ਇਹ ਪੋਸਟ ਹੁਣ ਤੱਕ 16 ਵਾਰ ਖੋਲ੍ਹ ਕੇ ਪੜ੍ਹੀ ਗਈ

ਧੀ ਧਿਆਣੀ

ਹਾਇਕੁ-ਲੋਕ ਦੇ ਦੂਜੇ ਵਰ੍ਹੇ 'ਚ ਇੱਕ ਹੋਰ ਨਾਂ ਆ ਜੁੜਿਆ ਹੈ- ਨਿਰਮਲ ਸਤਪਾਲ । ਆਪ ਰਾਜਨੀਤੀ ਸ਼ਾਸਤਰ, ਹਿੰਦੀ ਤੇ ਪੰਜਾਬੀ 'ਚ ਐਮ. ਏ. -ਐਮ.ਐਡ. ਹਨ। ਅੱਜਕੱਲ ਸਰਕਾਰੀ ਸੀਨੀਅਰ ਸਕੈਂਡਰੀ ਸਕੂਲ ਨੂਰਪੁਰ ਬੇਟ (ਲੁਧਿਆਣਾ) ਵਿਖੇ ਬਤੌਰ ਪ੍ਰਿੰਸੀਪਲ ਸੇਵਾ ਨਿਭਾ ਰਹੇ ਹਨ। ਹੁਣ ਤੱਕ ਆਪ ਦੇ ਦੋ ਕਾਵਿ ਸੰਗ੍ਰਹਿ- ਸਾਹਾਂ ਦੀ ਸਾਂਝ (2009) ਤੇ ਸਾਹਾਂ ਦੀ ਤੰਦ (2011) ਅਤੇ ਇੱਕ ਕਹਾਣੀ ਸੰਗ੍ਰਹਿ - ਨਵੀਂ ਸੋਚ ਆ ਚੁੱਕਿਆ ਹੈ। 
ਅੱਜ ਆਪ ਨੇ ਹਾਇਕੁ ਲੋਕ ਨਾਲ਼ ਸਾਂਝ ਇੱਕ ਚੋਕਾ ਲਿਖ ਕੇ ਪਾਈ ਹੈ। ਮੈਂ ਹਾਇਕੁ-ਲੋਕ ਮੰਚ ਵਲੋਂ ਆਪ ਦਾ ਤਹਿ ਦਿਲੋਂ ਸੁਆਗਤ ਕਰਦੀ ਹਾਂ। ਆਸ ਕਰਦੀ ਹਾਂ ਕਿ ਆਪ ਅੱਗੋਂ ਵੀ ਸਾਡੇ ਨਾਲ਼ ਇਸੇ ਤਰਾਂ ਜੁੜੇ ਰਹਿਣਗੇ ਤੇ ਆਪਣੀ ਕਲਮ ਦੀ ਸਾਂਝ ਪਾਉਂਦੇ ਰਹਿਣਗੇ। 

ਧੀ ਧਿਆਣੀ ਏ 
ਘਰ ਦੀ ਸ਼ਾਨ ਹੁੰਦੀ
ਧੀਆਂ ਬਿਨਾਂ ਨੇ
ਸੁੰਨੇ ਨੇ ਘਰ ਲੋਕੋ
ਪੁੱਛੋ ਉਸ ਤੋਂ 

ਜਿਸ ਘਰ ਧੀ ਨਹੀਂ 

ਬੀਆਬਾਨ ਹੀ

ਹੁੰਦੇ ਨੇ ਘਰ ਲੋਕੋ 

ਅੱਜ ਧੀ ਓਹ

ਕੱਲ ਨੂੰ ਮਾਂ ਬਣਨਾ

ਚੱਲੇ ਦਿਨੀਆਂ 

ਧੀਆਂ ਨਾਲ਼ ਹੀ ਲੋਕੋ 

ਕੁੱਖ 'ਚ ਕਿਓਂ

ਧੀਆਂ ਨੂੰ ਮਾਰਦੇ ਹੋ

ਬੇਦਰਦੀਓ 

'ਨਿਰਮਲ' ਰੂਹ ਹੈ

ਧੀਆਂ ਦੀ ਜਾਨ ਲੋਕੋ!

ਨਿਰਮਲ ਸਤਪਾਲ 

(ਲੁਧਿਆਣਾ) 

{ਨੋਟ- ਇਹ ਪੋਸਟ ਹੁਣ ਤੱਕ 67 ਵਾਰ ਖੋਲ੍ਹ ਕੇ ਪੜ੍ਹੀ ਗਈ }